माघ ३०, पोखरा । पोखरामा जारी २४औँ आहारारा गोल्डकप फुटबल रोचक हुँदै गएको छ । बुधबार भएको सेमिफाइनलमा चर्च व्याइज युनाइटेडलाई हराउँदै नेपाल पुलिस फाइनलमा प्रवेश गरेपछि खेल थप रोचक बन्दै गएको हो । पुलिसले उपाधिका लागि थ्रिस्टार वा ब्ल्याक बुल्समध्ये एउटा टिमसँग प्रतिष्पर्धा गर्ने छ ।
बुधबारको खेलमा विजय प्राप्त गरेपछि आहारारा गोल्डकपमा नेपाल पुलिस ११औँ पटक फाइनल प्रवेश गरेको हो । यसअघिका १० वटा फाइनल खेलमा ६ पटक मात्रै उपाधि हात पारेको पुलिसका लागि यो अर्को अवसर हो । विगतका ४ वर्षसम्म भने पुलिस फाइनलसम्म आउन सकेको थिएन ।
बुधबार भएको खेलमा पुलिसले ५८औँ मिनेटमा गोल अग्रता लिएको थियो । सञ्जिव लामाले प्रहार गरेको सो गोल नै पुलिसलाई फाइनलमा पुर्याउने निर्णायक गोल बन्न पुग्यो । लामाले २५ यार्ड टाढाबाट अनौठो तरिकाले गोल गरेका थिए ।
