चैत १२, पोखरा । सूर्य तारा क्लबको आयोजनामा पोखरामा खेलकुद तथा साँस्कृतिक महोत्सव–२०८२ हुने भएको छ । पोखरा महानगरपालिका वडा नं. २७ मा स्थापित यस क्लबले आगामी चैत २७ देखि ३० गतेसम्म महोत्सव गर्ने भएको हो । बि.स.२०७५ सालबाट स्थापना भएर निरन्तर सामाजिक कार्यमा सक्रिय यस क्लबले आयोजना गर्न लागेको यो तेस्रो खेलकुद महोत्सव हो ।
‘पर्यटनका लागि खेलकुद’ भन्ने नाराका साथ आयोजित सो महोत्सवमा ७ वटा खेलको प्रतियोगिता हुने क्लबका अध्यक्ष विष्णु पुनले जानकारी दिए । अध्यक्ष पुनका अनुसार महोत्सवमा ‘सेभेन ए साइड पुरुष फुटबल’, ‘खुल्ला महिला स्लो स्कुटर रेस’, खुल्ला महिला डोरी तान, खुल्ला पुरुष डोरी तान, जातीय संघसँस्था स्तरीय झाँकी प्रदर्शनी, एथ्लेटिक्स र तेक्वान्डो प्रदर्शनी प्रतियोगिता हुनेछ ।
महोत्सवबारे जानकारी दिँदै अध्यक्ष पुनले भने, ‘हामीले महोत्सवको तयारी करिब–करिब सकिसकेका छौँ । भण्डारढिकको महोत्सवको स्वदेशी तथा विदेशी २५ लाखभन्दा बढी खेलप्रेमीहरुले प्रत्यक्ष वा अप्रत्यक्ष रुपमा अवलोकन गर्ने हाम्रो विश्वास छ ।’
क्लबले प्रतियोगितामा सहभागीहरुलाई आकर्षक पुरस्कारको समेत व्यवस्था गरेको छ । ‘सेभेन ए साइड’ फुटबलमा प्रथम स्थान प्राप्त गर्ने समूहलाई रु.दुई लाख दुई हजार दुई सय बाईस (२,०२,२२२) नगद पुरस्कार रहेको छ । द्धितिय हुने समूहले रु.एक लाख एक हजार एक सय एघार (१,०१,१११) प्राप्त गर्नेछ ।
यसैगरी महिला र पुरुष डोरीतान प्रतियोगितामा प्रथम, द्धितीय र तृतीय पुरस्कार क्रमशः रु.५५५५५, ३३३३३ र २२२२२ नगद रहेको बताइएको छ । जातीय संघसँस्था स्तरीय झाँकी प्रदर्शनी प्रतियोगितामा पनि प्रथम, द्धितीय र तृतीय समूहले क्रमशः रु.४४०००, ३३००० र २२००० पुरस्कार प्राप्त गर्नेछन् । झाँकीमा सहभागी सबै समूहलाई रु.७००० नगद प्रदान गर्ने आयोजकले जनाएको छ ।
आयोजकका अनुसार महिला ‘स्लो स्कुटर रेस’ प्रतियोगिताको प्रथम, द्धितीय, तृतीय र सान्त्वना स्थानले क्रमशः रु.३३०००, २२०००, ११००० र ५००० नगद पुरस्कार प्राप्त गर्नेछन् । यथ्लेटिक्स प्रतियोगितामा सहभागी विद्यालय स्तरीय छात्र तथा छात्रा, खुल्ला पुरुष तथा महिला, भेट्रान्स पुरुष तथा महिलाको पनि प्रथम, द्धितीय र तृतीय स्थानलाई नै आकर्षक पुरस्कारको व्यवस्था रहेको क्लबले जनाएको छ । महोत्सव पोखरा–२९, भण्डारढिकस्थित प्रस्तावित रङ्गशालामा हुनेछ ।
